أعلن نجيب الطاهري، كابو فصيل “فطال تيغرز” المساند لفريق المغرب الرياضي الفاسي، عن تعرضه لمضايقات من طرف مجهولين بسبب نشاطه داخل الفصيل الساللف الذكر
وقال نجيب الطاهري في تدوينة على صفحته الشخصية على موقع فيسبوك، أنه أصبح منذ مدة يتعرض لمضايقات بلغت حتى حد تهديده بأسرته الصغيرة والدته ووالده
وكتب الطاهري قائلا : ” من مور ما درت وليدات و الوالدين كبرو و الحمل تقال خديت قرار نبعد بحالي من المشاكيل ديال الماص، ماشي خوف على راسي و لكن خايف عليهم تجي فيا و يبقاو يمسحو فيهم شمايت رجليهم. كنتفاجئ أن من مور كل مقابلة كيتم فيها رفع شعارات من طرف الجمهور كنتلقى أنا التهديد، المرة الأولى وصلني تهديد مباشر فيه بلا منرجعو دراري صغار راه عندك بنيتة دابا و المرة التانية فيه راك كتقلب على الموشكيل أسي الكابو و قبل منهم شكاية عند البوليس و هادشي كامل و أنا ساكت كنقول نديها فراسي كتجي غير فيا ولي بغى يقول خاف ولي بغى يقول تمرق و سكت شغلو هاداك”
وأضاف أحد أبرز قيادات الفطال تيغرز منذ تأسيسها، أنه صباح اليوم توصل بتهديد خطير وصفه بـ “السطاج الوحش”، بعدما زارها مجهولون في مكان عمله لإبلاغه رسالة من طرف أحد الأشخاص
وجاء في تدوينة الطاهري :” يا الله فتحت محالي و كنضرب الجفاف كيوقفو عليا الأنضار، السلام انت هو نجيب قولت أه هو انا، حنا سيفطنا فلان هاهو بغى يهضر معاك من الحبس، علاش ياك لباس، غير بعد من فلان مول الماص و انت خونا معندك مادير بالصداع و راه هضرنا مع الأنضار كريط صاحبك دابا يصوني ليك حتى هو”
وختم الطاهري تدوينته قائلا :”المهم أنا كيف سبق و قولت رجعت اللور و ديتها فراسي و لكن منين وصلنا لهاد لمواصل أنا هو أكبر عكسي و إلى عندك سوارت ديال الحبس سيفطني ليه و إلى غتسيفط الأنضار قولهم يقتلوني راه هادو لي جاو هاد الصباح غير صحابي بقاو ينصحوني نبعد بحالي و صافي. و الكامرات كاينين و دراري لي كانو معايا صباح راهم شاهدين و الله حتى توحلو فيا”
تدوينة نجيب الطاهري، تفاعلت مع جماهير الماص بشكل كبير، حيث رفضت التضييق الذي يتعرض له، معلنة تضامنها معه ومؤكدة أن الفريق يحتاج إلى جميع أبناء فاس الغيورين على اللونين الأصفر والأسود
